Virus Quartett

Haut interesséiere mer eis fir eng Publicitéits-Iddi déi wierklech gelongen ass. Wéi mécht een am beschte Reklamm fir eng Firma déi Sécherheet um Netz verkeeft ? Majo, mat engem witzegen an originelle Spill-Konzept dee beweist dass de Betrib net nëmmen Ahnung vum Métier huet, mee dat Ganzt net zevill enk gesäit.

Dëst geschitt unhand vum ‚Virus-Quartett'. Et ass e Kaarten-Spill dat et an all méiglechen Ausféierunge mat Autoen, Fligeren oder Schëffer scho jorelaang gëtt a woumat scho Generatiounen a Generatiounen an de Schoul-Pausen hir Zäit verbruecht hunn. Et huet een op all Kaart en anere Virus bei deem all kéier e kuerzen Erklärungssaz iwwert seng Auswierkungen op de Computersystem steet an donieft och eenzel Charakteristike wéi Gréisst, Entdeckung, Distributioun a Schued. De Prinzip ass einfach: et spillt ee géingt de Computer, an zwar Kaart fir Kaart. Als User wielt een einfach bei all Virus d'Charakteristik aus mat där ee géingt de Géigner wëll untrieden. Huet een da méi e geféierleche Virus oder een dee méi grouss ass, gewënnt een. Ass de Virus schonn zevill aal oder net schiedlech genuch, verléiert een.

Den ‚Virus-Quartett' ass eng reng Publicitéits-Iddi. E war extra fir d'B2D zu Gelsenkirchen, also eng ‚Fach-Messe' wéi se an Däitschland soen, entwéckelt ginn, an ass elo fir de ‚Grand Public' um Site ‚Virusquartett.de' accessibel. D'Illustratioune si vum Jo Zimmermann.